Canelóns recheos de pescada rosada e coliflor

• 

• 

• 

• 

• 

Nestas datas o cociñar, mais sobre todo o comer, váisenos un pouco das mans. É por isto que sempre acabamos con cantidades inxentes de sobras no frigorífico. Como xa sabedes, nesta casa non se estraga nada así que, máis unha vez, toca darlle unha volta aos miolos e inventar novas receitas. 

Neste caso, ideei uns canelóns recheos de pescada rosada  e coliflor. Espero que vos guste!

Ingredientes:

• 400 g. de coliflor (aproveitaremos tamén as follas se as temos).
• 300 g. de pescada (rosada, do pincho… a que máis vos guste).
• 30 ml. de caldo de peixe.
• 100 ml. tomate natural triturado.
• 10 láminas de lasaña fresca.
• 25 g. de queixo San Simón afumado.

Pasos a seguir:

• Relar a coliflor cun relador.
• Cortar as follas da coliflor en anaquiños cunha tesoira e escaldar en auga fervendo durante 3 minutos.
• Desfacer os touros de pescada e mesturalos coa coliflor.
• Poñer unha tixola ao lume cun fío de AOVE a lume medio. Engadir a mestura de coliflor e pescada e saltear durante uns minutos. A continuación, engadir o caldo de peixe e 50 ml de tomate natural triturado. 
• Baixar o lume a medio/baixo. Deixar que a mestura se cociñe durante uns 8 minutos ou até que se consuma o líquido.
• Quencer o forno a 180 graos centígrados.
• Coller unha lámina de lasaña e poñer dúas culleradas da mestura a 2 cm do extremo. A continuación, enrolar a masa até conseguir un canelón. Facer este paso con todas as láminas de lasaña.
• Poñer 3 culleradas de tomate natural cubrindo o fondo da bandexa na que enfornaremos os canelóns. Despois, colocar os canelóns uns ao lado do outros até completar a bandexa.
• Cubrir a superficie dos canelóns co tomate e a mestura de coliflor e pescada restantes.
• Relar o queixo San Simón por riba para darlle un toque afumado ao prato. 
• Enfornar 15 minutos a 180 graos.
• Deixar repousar 15 minutos antes de servir.

Como aproveitar as sobras das patacas cocidas?

Un dos primeiros trucos de aproveitamento que aprendín, sendo ben pequena, foi o de aproveitar as patacas cocidas do mediodía para facer unhas patacas fritidas pola noite. Máis unha vez, obtemos algo moi saboroso dunha cousa tan simple como unha pataca cocida. ⁣
⁣
Na miña infancia, estas patacas fritidas ían sempre acompañadas dun ovo con puntilla. E para min, esta elaboración era mellor que calquera prato de marisco. Era un menú que recendía a fogar. Este é o tipo de recordos que, cada vez que o lembro, volvo notar o sabor.
⁣
Se vos atrae a idea, mais preferides unha opción máis saudábel, sempre podedes facer as patacas no forno e trocar o ovo fritido por un escalfado. Estará igual de bo!

Como aproveitar as codias do queixo?

Hoxe tráiovos un truco para potenciar o sabor dos vosos pratos, sobre todo o dos guisos e estufados. Como fanática da cociña de aproveitamento, sempre estou a buscar novos usos para as sobras ou aquelas partes dos alimentos que, de primeiras, parecen estar abocados a acabaren no lixo.

Neste caso quería compartir convosco as incríbeis propiedades do parmesano e o pecorino como potenciadores do sabor. Estes queixos italianos (cheos de umami) teñen un toque especial que enxalza o sabor de calquera prato (risotto, pasta, carne…), mais sempre acabamos por estragar as codias ao pensarmos que non valen para nada. Este erro, malia ser moi común, é doado de solucionar. So tedes que ir gardando estes anacos no frigorífico e empregalos para incrementar o sabor das vosas elaboracións.

Agora estaredes a pensar: “mais iso cómese?”. Pois, como sempre, vai no gusto de cada un. Hai quen os retira á fin do cociñado (as veces até desaparece por si só) e quen os deixa como un elemento máis do prato. Persoalmente, direi que non sabe nada mal. Ten unha textura algo xelatinosa ao amolecer durante a cocción, mais en cuestión de gusto non ten dúbida.

Afóutovos a que lle deades unha oportunidade, xa veredes que non vos arrepentides!

Marmelada de kiwi e pexego

• 

• 

• 

• 

Hoxe tráiovos unha receita doce coa que dar uso a esas froitas que se vos están a estragar nestes días de calor abafante. Unha das miñas obsesións na cociña é o buscarlle sempre unha segunda vida a eses produtos que se están a derramar: sobras de días anteriores, produtos a piques de esmorecer ou mesmo eses alimentos que van quedando orfos no frigorífico.

Nesta ocasión decidín partillar convosco o que adoito facer coa froita madura antes de que bote barola; marmelada de kiwi e pexego. Este doce é un produto bastante versátil, xa que vale tanto para almorzar (cunhas boas torradas) ou como complemento para unha boa sobremesa. O tipo de froita a empregar é completamente aleatorio: podedes botar man das que máis vos gusten. Eu acostumo utilizar froitas algo acedas, porque non son moito de lambetadas.

Ingredientes

• 1 kg. de froita.
• 400 g. azucre refinado.
• Zume de ½ limón.

Instrucións

• Botar a froita pelada nun recipiente e pisala até que quede feita puré. Se, pola contra, a vós gústavos máis con tropezóns, adiante!
• Unha vez teñamos o puré listo, amalgamarémolo co azucre e darémoslle un repouso de 3 horas no frigorífico.
• Pasado este tempo de refrixeración, botaremos a mestura nunha pota e porémola a lume medio/baixo, removendo cada pouco, durante uns 45 minutos. O tempo de cocción dependerá do espesor que lle queirades dar.

Nota: Se queredes controlar o espesor da marmelada podedes empregar azucre xelificante ou un chisco de ágar–ágar. Alén diso, se tedes unha panificadora e queredes otimizar o voso tempo, a maioría destes aparatos traen xa un programa para marmeladas.