![](https://recendo.wordpress.com/wp-content/uploads/2020/05/933964_10201770845857711_92699486_n.jpg?w=575)
Boas!
Son Noemí, as mans e os miolos detrás de Recendo.
Aínda que son filóloga — de formación— e tradutora — de profesión— a cociña sempre ocupou un lugar moi especial no decurso da miña vida.
Crecín enredando ao abeiro das cociñas das matriarcas da miña casa. Sobre todo a cociña da miña avoa Carmiña, muller batalladora e aquelada que —coas súas eternas tixolas de ferro e catro patacóns— era quen de orquestrar xantares sinxelamente inesquecibles.
O recendo desas cociñas é unha lembranza que vai sempre comigo. Por iso —despois de moitos anos de indecisión— resolvín darlle forma a esta bitácora; nube onde xuntar a tradición das ensinanzas pegadas na memoria cos trazos multiculturais que fun apañando polo camiño.
Acompañádesme?