Canelóns recheos de pescada rosada e coliflor

• 

• 

• 

• 

• 

Nestas datas o cociñar, mais sobre todo o comer, váisenos un pouco das mans. É por isto que sempre acabamos con cantidades inxentes de sobras no frigorífico. Como xa sabedes, nesta casa non se estraga nada así que, máis unha vez, toca darlle unha volta aos miolos e inventar novas receitas. 

Neste caso, ideei uns canelóns recheos de pescada rosada  e coliflor. Espero que vos guste!

Ingredientes:

• 400 g. de coliflor (aproveitaremos tamén as follas se as temos).
• 300 g. de pescada (rosada, do pincho… a que máis vos guste).
• 30 ml. de caldo de peixe.
• 100 ml. tomate natural triturado.
• 10 láminas de lasaña fresca.
• 25 g. de queixo San Simón afumado.

Pasos a seguir:

• Relar a coliflor cun relador.
• Cortar as follas da coliflor en anaquiños cunha tesoira e escaldar en auga fervendo durante 3 minutos.
• Desfacer os touros de pescada e mesturalos coa coliflor.
• Poñer unha tixola ao lume cun fío de AOVE a lume medio. Engadir a mestura de coliflor e pescada e saltear durante uns minutos. A continuación, engadir o caldo de peixe e 50 ml de tomate natural triturado. 
• Baixar o lume a medio/baixo. Deixar que a mestura se cociñe durante uns 8 minutos ou até que se consuma o líquido.
• Quencer o forno a 180 graos centígrados.
• Coller unha lámina de lasaña e poñer dúas culleradas da mestura a 2 cm do extremo. A continuación, enrolar a masa até conseguir un canelón. Facer este paso con todas as láminas de lasaña.
• Poñer 3 culleradas de tomate natural cubrindo o fondo da bandexa na que enfornaremos os canelóns. Despois, colocar os canelóns uns ao lado do outros até completar a bandexa.
• Cubrir a superficie dos canelóns co tomate e a mestura de coliflor e pescada restantes.
• Relar o queixo San Simón por riba para darlle un toque afumado ao prato. 
• Enfornar 15 minutos a 180 graos.
• Deixar repousar 15 minutos antes de servir.

Marmitako de ventrecha de bonito

O marmitako é un dos guisos chave da gastronomía do cantábrico (Especialmente en Cantabria e Euskadi). Este recibe o seu nome polo recipiente no que se prepara, unha ola metálica chamada marmita.

Ingredientes

• 5 patacas medianas.
• 1 kilo de ventrecha de bonito.
• 1 cebola.
• 1 dente de allo.
• 2 culleradas de sobremesa de pemento choricero.
• Sal
• AOVE.

Pasos a seguir

• Picar a cebola en brunoise.
• Poñer unha pota ao lume con 30 ml de AOVE. Botar a cebola e o allo cun chisco de sal. Sofritir até que a cebola torne dourada. 
• Engadir o pemento ao sofrito.
• Chascar as patacas e incorporar á pota. Mesturar co sofrito e cubrir con auga.
• Deixar cociñar a lume baixo durante 20/25 minutos.
• Corrixir de sal e, nos últimos 5 minutos de cocción, engadir o bonito cortado en touros.
• Deixar repousar antes de servir.

Salmón Teriyaki con arroz e salteado choi

Ingredientes (para 2 persoas)

• 2 toros de salmón.
• 6 culleradas de arroz Basmati.
• 50 ml. mollo Teriyaki.
• 20 ml. mollo agridoce picante.
• 2 dentes de allo.
• AOVE.
• 400 g. de Buk choi/Pak choi.
• 300 ml. caldo de pescado.

Pasos a seguir

• Mesturar 30 ml. de aceite cos mollos (Teriyaki e agridoce) e o allo ben picadiño.
• Poñer os toros de salmón nunha bandexa de forno e pintar coa mestura dos mollos.
• Enfornar 8 minutos a 200 graos centígrados.
• Escaldar o Pak choi ou Bok choi (eu emprego unha mestura dos dous) durante 3 minutos e, a continuación, saltear cun fío de aceite.
• Cocer o arroz en 300 ml. de caldo de pescado durante 10 minutos (seguide os tempos de cocción que vos marque o paquete de arroz).
• Servir un toro de salmón acompañado do arroz e das verduriñas choi.

Fricolada de bocartes

Esta semana tráiovos unha receita que non fago moi a miudo mais que, de cando en cando, entra no menú para nos dar o gusto: fricolada de bocartes. Polo xeral sempre preparo o peixe ao forno ou á prancha, emporiso, ás veces hai que facer algo de trampa e botar man da tixola.

Para esta receita, no canto de empregar pan relado, fago sempre unha mestura de fariña de garavanzo e polenta para que os bocartes queden ben crocantes e pouco graxos. 

Ingredientes:

• 1 kg. Bocartes en filetes.
• 100 g. Fariña de garavanzo.
• 50 g. Polenta.
• Sal.
• Aceite de oliva.
• 1 limón.

Pasos a seguir:

• Limpar e filetear ben os bocartes. Se non sodes quen de facer este traballo, preguntade na peixaría.
• Quentar unha tixola a lume medio/alto con aceite de oliva. 
• Pasar os bocartes pola mestura de fariña de garavanzo e polenta. 
• Cando o aceite estea ben quente (mais sen chegar a fumegar) introducir os bocartes e deixar frixir 1 ou 2 minutos (máximo).
• Servir cun limón en rebandas e espremer por riba.  

Opcións: Podedes acompañar os bocartes dunha boa ensalada ou duns pementos de Padrón, por exemplo. Ás veces, tamén acompaño este prato cunha salsa de iogur e mostaza no canto do limón.

Polbo á prancha con salteado de grelos

Comezamos a semana cunha das miñas receitas favoritas: Polbo á prancha con salteado de grelos. Para min, os grelos son o Santo Grial da cociña. Ese ingrediente que non cambio por nada do mundo. Se teño que elixir entre uns grelos e a peza de marisco máis suculenta, sempre vou ter clara a miña elección. Por outra banda, o polbo forma parte da miña tradición, como mugardesa, este outro ingrediente tampouco pode faltar.

Ingredientes

• 1 polbo.
• 1 folla de loureiro
• 500 g. de grelos
• Sal.
• Pemento picante afumado.
• AOVE.
• 1 allo laminado.

Pasos a seguir

• Se ides traballar cun polbo fresco é preciso mazalo primeiro para romper as fibras e que non quede duro. Se pola contra non queredes pasar por ese proceso, eu recomendo conxelar a peza de polbo uns días. Deste xeito as fibras romperanse soas no conxelador.
• Cocer o polbo en auga salgada durante uns 15 minutos (por kg.) e despois deixar repousar outros 20 co lume apagado. A tradición di que hai que “asustar” o polbo somerxéndoo 3 veces na auga antes de cocer. Non sei se isto realmente axuda na cocción, mais eu sempre o fago (por se acaso!)
• Unha vez teñamos o polbo cocido, é preciso deixalo arrefriar nun escoadoiro antes de cortar para poñer na prancha.
• Limpar ben os grelos e cortalos en anacos.
• Cociñalos en auga fervendo durante uns 10 minutos.
• Poñer os grelos nun escoadoiro para que perdan o exceso de auga.
• Cortar os tentáculos do polbo á metade (se son moi gordos podedes facer 3 láminas).
• Acender a prancha a lume medio/alto. Botar un fío de AOVE e poñer as láminas de polbo de 5 a 10 minutos por cada lado (todo dependerá da potencia da vosa prancha).
• Mentres, por unha tixola ao lume con dúas culleradas de AOVE.
• Botar os allos laminados para que dean sabor ao AOVE.
• Unha vez os allos vaian collendo color, engadiremos os grelos (e unhas pedras de sal) para saltear, durante uns minutos e xa estarían listos para servir.
• Cando teñamos o polbo listo, empoarémolo lixeiramente con pemento picante, botaremos unhas pedras de sal e un fío de AOVE.
• Servir e chegar ao Nirvana.

Arroz con cúrcuma e choco

Hoxe tráivos unha receita mariñeira composta por un arroz con cúrcuma e choquiños da ría. Este arroz é un dos nosos preferidos pola potencia de sabor que aporta o choco macerado en mollo de ostras.

Ingredientes para 2 personas

• 8 culleradas de arroz bomba.
• 500 g. de choco. Se non sabedes limpalo, pedide que volo limpen na peixaría e que vos garden a tinta (para facer con arroces é un potenciador de sabor boísimo!).
• 20 ml. de mollo de ostras.
• 20 ml. de whisky.
• Zume de 1 laranxa.
• Sal.
• 1 cullerada de concentrado de pasta de xenxibre e allo
• AOVE.
• 1 culler de sobremesa de cúrcuma.
• 1 litro de caldo de peixe.

Pasos a seguir

• Cortar o choco en anaquiños e deixalo macerar durante 15 minutos.
• Para preparar o macerado é preciso mesturar o choco coa salsa de ostras, o zume de 1 laranxa e 30 ml. de AOVE.
• Pasado este tempo, quentar unha tixola a lume medio e saltear o choco xunto coa salsa do macerado e o concentrado de xenxibre e allo durante 15/20 minutos ou até que o choco estea brando.
• A media cocción, botar os 20 ml. de whisky e deixar que cociñe até que se evapore.
• Unha vez o choco estea case listo, engadir as 8 culleradas de arroz e a cúrcuma. Mesturar ben e deixar que o arroz absorba o sabor dos mollos na tixola.
• A continuación, engadir un litro de caldo de peixe e subir o lume ao máximo até que o caldo comece a burbullar. Este será o momento de baixar o lume ao mínimo e deixar que se cociñe o arroz durante 30 minutos.
• É importante non tocar nin remover o arroz durante a cocción.

Vieiras especiadas en tempura

• 

• 

• 

Ingredientes:

• 6 vieiras limpas (se vós non sodes quen de limpalas, pedide na peixaría que volo preparen).
• 20 g. de allo en po.
• 8 g. de sal.
• 10 g. de sementes de comiño (ou comiño en po, se preferides).
• 1 vaso de fariña tempura.
• 1 vaso de auga moi fría.
• AOVE.

Pasos a seguir:

• Cortar as vieiras en dúas metades.
• Mesturar o allo, o comiño, o sal e a fariña nun recipiente.
• Engadir a auga e bater até conseguir un líquido cremoso e sen grumos.
• Quentar un cazo con bastante aceite a lume medio/alto.
• Impregnar as vieiras coa tempura e frixir durante 1 minuto por cada lado.
• Deixar escorrer o exceso de aceite sobre papel de cociña antes de consumir.

Nota: Este prato pódese servir como petisco ou como prato principal acompañado dunha ensalada.

Bocartes en vinagre

• 

• 

Hoxe tráiovos a receita dun petisco extraordinariamente simple e delicioso: Bocartes en vinagre. Neste caso, estou a compartir convosco un anaco da sabedoría culinaria familiar xa que a receita é a que meu pai (o experto mariñeiro da casa) emprega sempre que prepara bocartes na casa.

Ingredientes:

• 1 kg. Bocartes.
• 1 vaso de vinagre de viño.
• 2 vasos de auga.
• 1 presa de sal gordo.
• 2 dentes de allo grandes.
• 1 presa de pirixel.
• AOVE

Pasos a seguir:

• Limpa coidadosamente os bocartes para separar os dous filetes sen rompelos. Se non tes moito tino limpando peixe, pide que cho limpen la peixaría.
• Coloca cada filete en liña e facendo capas nun recipiente con tapa.
• Bota o sal, o vinagre e a auga e deixa que macere durante 4h.
• Pasado este tempo, quita o peixe do líquido e pásao por auga para quitar o exceso de vinagre e sal.
• Despois de escorrelo, colócao de novo nun  recipiente con tapa xunto con capas de pirixel e allo laminado e cubre con AOVE.
• Deixa que repouse no frigorífico durante un mínimo de 5 días para que colla todo o sabor posíbel.
• Pódelos servir en ensalada, en tostas ou como petisco acompañado dun bo pan.

Notas: Nota 1: É importante conxelar os bocartes durante 5 días antes de preparar esta receita para evitar intoxicacións por anisakis. Nota 2: Lembra quitalos do frigorífico polo menos unha hora antes de consumir para que o AOVE (que estará completamente solidificado) torne líquido de novo.

Ovos recheos de atún

• 

• 

Os ovos recheos de atún son un clásico estival na miña casa. A frescura e a sinxeleza desta receita convértena no prato perfecto para os días de calor. Alén diso, estes ovos fan un xantar moi económico ao levaren unicamente 4 ingredientes (todos eles de baixo custo).

Ingredientes:

• 10 ovos.
• 500 g. de atún en aceite.
• 50 ml. puré de tomate ou tomate fritido.
• 150 g. maionesa.
• Opcional: Tabasco ao gusto.

Pasos a seguir:

• Encher un cazo de auga cun chisco de sal e introducir os ovos. Unha vez comece a ferver a auga, deixar cocer durante 10 minutos.
• Cando os ovos estean cocidos, botar en auga fría (ou auga con xeo) para que arrefríen.
• Unha vez fríos, cascar e cortar os ovos ao medio de xeito vertical.
• Separar as claras das xemas e reservar estas últimas para o recheo.
• Esfaragullar o atún e as xemas nun recipiente (tendo conta de reservar unha das xemas para decorar).
• Incorporar 40 ml. do puré de tomate e mesturar ben até obter un recheo homoxéneo.
• Cubrir o fondo dunha bandexa cos 10 ml. restantes do tomate e 50 g. de maionesa, ben mesturados.
• Incorporar una cullerada de sobremesa de recheo en cada metade de ovo e colocar (co recheo cara abaixo) na bandexa.
• Por último, cubrir cada ovo cunha capa fina de maionesa e relar a xema restante por riba.
• Meter no frigorífico polo menos 30 minutos antes de servir.