Esta receita, perfecta para calquera comida (sobre todo nos brunch que están tan de moda) recibe este nome tan dantesco polas súas cores. En Nápoles, lugar onde parece ter orixe este prato, din que estes ova ‘mpriatorio representan as animas intentando fuxir das chamas do purgatorio (o tomate). Alén diso, cada un pode buscar a súa propia interpretación alegórica a este prato cheo de sabor e cor.
Xeralmente, adoito acompañar esta receita con arroz basmati mais, nesta ocasión, decidín probar algo diferente e darlle un toque brunch, incorporando as chulas, máis típicas do almorzo.
Ingredientes para os ovos
6 ovos.
250 ml. tomate natural triturado.
2 dentes de allo.
AOVE.
Sal.
Po de chiles.
Pirixel.
Pasos a seguir
Botar un fío de AOVE nunha tixola a lume medio.
Incorporar 2 dentes de allo moídos.
Cando o allo comece a estar dourado, incorporar o tomate que se cociñará durante uns 5 minutos.
Sapementar ao gusto.
Engadir os ovos ao tomate e deixar que se cociñen coa tapa posta durante uns 3 minutos.
Cubrir con pirixel en po e servir.
Ingredientes para as chulas
180 g. de fariña de garavanzo.
120 ml. de leite de avea.
50 g. de xamón serrano en taquiños.
½ cullerada de sobremesa de allo en po.
½ cullerada de sobremesa de lévedo seco.
Pasos a seguir
Mesturar os ingredientes secos co leite de avea até conseguir unha masa sen grumos.
Engadir os taquiños de xamón.
Quentar unha tixola a lume medio cun fío de aceite.
Botar unha cullerada de masa e deixar que cociñe o primeiro lado até que a superficie burbulle.
Unha vez dada a volta, deixar que se cociñe medio minuto máis.
A larpeira é un dos doces máis representativos da gastronomía galega, sobre todo nas zonas de Ferrolterra e Monforte de Lemos. Xunto coa bola de nata ou a bica, a larpeira soe ser a raiña das sobremesas do patrón (ou calquera outra sobremesa/almorzo que queiramos mellorar un 100%).
Nesta ocasión, como de costume, ímoslle dar unha volta á receita orixinal introducindo elementos externos como a vainilla ou o limoncello.
Ingredientes
Para a bola:
400 g. fariña de forza.
2 ovos.
100 g. azucre.
30 g. lévedo fresco.
100 g. leite gordo.
20 ml. extracto de vainilla.
100 g. manteiga clarificada.
Peleca relada dun limón.
1 chisco de sal.
Crema pasteleira:
250 ml. leite gordo.
20 g. amidón de maínzo.
1 pau de canela.
Peleca de medio limón.
Peleca de media laranxa.
40 g. azucre.
1 ovo.
Glasa:
50 g. azucre glas.
1 chope de limoncello.
Pasos a seguir
Bola:
Disolver o lévedo no leite tépedo.
Botar a fariña, o sal, o azucre, a manteiga clarificada e a peleca relada de limón no recipiente do robot de cociña.
Mesturar empregando a pala do robot durante 1 minuto (aprox.).
Incorporar os ovos, o extracto de vainilla. Neste punto cambiaremos a pala polo gancho de amasado.
Unha vez amalgamados estes ingredientes, incorporaremos o leite. Deixaremos que amase durante uns 15 minutos ou até acadar unha masa tersa e brillante. Unha pista para saber cando a masa está lista e ver que xa non emporca os laterais do recipiente de amasado.
Cando teñamos a masa lista, poñerémola nunha bandexa con papel vexetal pintando con un pouco de aceite.
Dar forma a bola coas mans (pode ser redonda ou rectangular).
Deixar fermentar durante 2 horas. Mentres fermenta faremos a crema pasteleira.
Pasadas as 2 horas, faremos uns cortes profundos na masa en forma de cuadricula.
Encher as liñas das cuadriculas coa crema pasteleira empregando unha manga pasteleira.
Pintar a bola con ovo batido antes de enfornar.
Enfornar a 170 graos centígrados durante 20 minutos.
Pintar coa glasa en canto a larpeira saia do forno.
Deixar arrefriar nunha grella durante 2 horas.
Crema pasteleira:
Disolver o amidón de maínzo en 30 ml. de leite.
Bater o azucre e o ovo até que estean ben incorporados.
Infusionar o resto do leite coa canela e as pelecas cítricas. Apagar o lume en canto ferva.
Retirar as pelecas e a canela. Logo incorporar o ovo e o azucre. Bater até que estea ben incorporado.
Poñer o cazo a lume baixo e incorporar a mestura de leite co amidón de maínzo.
Remexer continuamente até conseguir unha crema homoxénea.
Esta receita non podería ser máis doada de lembrar. Eu chámolle a receita dos 150, xa que é o número que tedes que apuntar para as cantidades. De feito, as medidas deste biscoito pódenvos servir de base para calquera biscoito que imaxinedes: con iogur, froitas, vainilla etc.
Ingredientes:
150 g. de fariña de trigo.
150 ml. de leite de coco.
150 g. de manteiga fundida.
150 g. de azucre.
3 culleradas de cacao en po.
3 ovos.
1 sobre de lévedo de repostaría.
Opcional: 5 ml. de extracto de améndoa amarga.
Pasos a seguir:
Mesturar o azucre coa xema dos ovos e a manteiga até conseguir una crema homoxénea.
Incorporar o leite de coco e o cacao en po.
Agregar, paseniño, a fariña mesturada co lévedo até obter unha masa cremosa e sen grumos.
Bater as claras a punto de neve.
Incorporar as claras á masa, aos poucos, facendo movementos envolventes.
Colocar a masa nun molde de biscoito.
Enfornar durante 25 ou 30 minutos a 170 graos centígrados.
Hoxe tráiovos unha receita doce moi básica que resulta moi práctica para solucionar os almorzos ou para poñer co café cando temos visita: biscoito de crema de limoncello.
Ingredientes
Biscoito
100 g. azucre.
150 g. fariña de trigo.
150 g. manteiga.
1 sobre de lévedo de repostaría.
1 chope de crema de limoncello.
25 g. de po de cítricos.
3 ovos.
Pasos
Mesturar o azucre, as xemas e a manteiga derretida. Bater até conseguir unha crema ben amalgamada.
Engadir o po de cítricos e o chope de crema de limoncello.
Introducir aos poucos a fariña mesturada co lévedo.
Bater as claras a punto de neve.
Incorporar as claras á masa facendo movementos envolventes para que non perdan aire.
Enfornar durante 25 minutos a 170 graos centígrados.
Glaseado
50 g. azucre glas.
Zume de medio limón.
Pasos
Unha vez o biscoito estea case frío, mesturar o azucre glas co zume de limón e bater até que quede ben disolto.
Pintar a superficie do biscoito coa mestura cítrica e deixar arrefriar.
Bo día! Acordádesvos dos dónuts que fixemos hai unhas semanas? Pois cando a cantidade de masa sexa máis do que precisamos, non é necesario facer todos los dónuts dun chimpo. Por sorte, este tipo de masa conxela perfectamente, polo que podedes deixala no conxelador até que a volvades necesitar. Neste caso, eu tiña sobrantes como para facer media ducia de roscas, mais decidín non gastar moito tempo e facer unha XXL, como se fose un queique.
Para a cobertura, no canto de pasar polo traballo de fundir chocolate, vernicei a superficie con crema de cacao (antes de que arrefriase por completo). Alén diso, para rematar cun toque cítrico, empoei a rosca coa mestura de laranxa e limón caseiro que vos ensinei a facer hai uns días.
Iso é todo! En menos de 30 minutos xa temos resolto un almorzo especial ou o acompañamento para o café se temos visita (e se non, tamén!).
Hoxe tráiovos unha receita doce coa que dar uso a esas froitas que se vos están a estragar nestes días de calor abafante. Unha das miñas obsesións na cociña é o buscarlle sempre unha segunda vida a eses produtos que se están a derramar: sobras de días anteriores, produtos a piques de esmorecer ou mesmo eses alimentos que van quedando orfos no frigorífico.
Nesta ocasión decidín partillar convosco o que adoito facer coa froita madura antes de que bote barola; marmelada de kiwi e pexego. Este doce é un produto bastante versátil, xa que vale tanto para almorzar (cunhas boas torradas) ou como complemento para unha boa sobremesa. O tipo de froita a empregar é completamente aleatorio: podedes botar man das que máis vos gusten. Eu acostumo utilizar froitas algo acedas, porque non son moito de lambetadas.
Ingredientes
1 kg. de froita.
400 g. azucre refinado.
Zume de ½ limón.
Instrucións
Botar a froita pelada nun recipiente e pisala até que quede feita puré. Se, pola contra, a vós gústavos máis con tropezóns, adiante!
Unha vez teñamos o puré listo, amalgamarémolo co azucre e darémoslle un repouso de 3 horas no frigorífico.
Pasado este tempo de refrixeración, botaremos a mestura nunha pota e porémola a lume medio/baixo, removendo cada pouco, durante uns 45 minutos. O tempo de cocción dependerá do espesor que lle queirades dar.
Nota: Se queredes controlar o espesor da marmelada podedes empregar azucre xelificante ou un chisco de ágar–ágar. Alén diso, se tedes unha panificadora e queredes otimizar o voso tempo, a maioría destes aparatos traen xa un programa para marmeladas.
Os dónuts teñen case tantos nomes como coberturas. Malia que dónut é o nome máis comercial, estes boliños tamén son alcumados como donas, berlinas, roscas ou picaróns.
As súas orixes, aínda que non o pareza, son ben antigas. Segundo o Smithsonian Magazine, os dónuts que coñecemos (e devoramos) hoxe día, proveñen dos olykoeks, uns doces típicos da cociña holandesa. Estes boliños de aceite que os colonos holandeses levaron a Manhattan aló polo 1624 fóronse modificando, xa en chan estadounidense, até se converter nas roscas glaseadas ou cubertas de mil sabores que hoxe coñecemos.
Canto á creación orixinal olykoeks, hoxe día aínda non está moi clara. Por unha banda, hai quen afirma que foros os xudeos sefardís de Portugal os que no século XV introduciron este doce típico do Hanukkah, nos Paises Baixos. Por outra banda, diversas voces indican que foros as tribos xermánicas as que deron vida aos olykoeks para seren degustados nas celebracións do Jól, durante o solsticio de inverno. De todos os xeitos, sexa quen for o verdadeiro creador desta lambetada, o que si queda claro é que a presencia destes doces nos receitarios de medio mundo, vén de lonxe.
Ingredientes da masa:
500 g. fariña de forza.
80 g. azucre.
250 ml. leite gordo.
15 g. lévedo fresco.
1 chisco de sal.
1 ovo batido.
50 g. manteiga.
5 ml. extracto de vainilla ou as sementes dunha vaíña.
Ingredientes do glaseado:
50 g. chocolate para fundir.
20 g. de manteiga.
120 g. azucre glas.
Primero de todo, é preciso facer un prefermento (unha especie de masa nai, por así dicilo), que axude ao proceso de levedado da masa.
Pasos para facer o Prefermento:
Disolver o lévedo fresco nun chorro de leite a temperatura ambiente.
Incorporar 3 culleradas de fariña na mestura de leite e lévedo até que teña textura de masa.
Deixar repousar 15 minutos
Pasos para facer a masa dos dónuts:
Mesturar a fariña, o azucre e o sal nun recipiente amplo que nos permita traballar a masa, se imos amasar a man. Se, pola contra, imos empregar un robot, podemos botar os ingredientes directamente no vaso de amasado.
Engadir o leite aos poucos, segundo o vaiamos incorporando á masa.
De traballarmos con robot, este será o momento de poñer o gancho amasador (sempre velocidade media) e engadir o ovo batido.
Engadir o prefermento ao conxunto e seguir amasando.
Unha vez a masa estea ben formada e xa non manche o recipiente de amasado (ou o vaso do robot) engadiremos a vainilla.
Cando a vainilla xa estea incorporada á masa, engadiremos a manteiga en dous tempos: primeiro unha metade e, cando xa non quede rastro dela, a outra metade.
Cando vexamos que a masa xa non pega nin mancha, xa estaría lista para repousar.
Deixar repousar 90 minutos
Pasos para formar os dónuts:
Estirar a masa cun rodete (espesor de 1,5 cm aprox.).
Dar forma aos dónuts cun molde redondo ou, se non temos molde, con calquera recipiente redondo ou cortador de pasta que teñamos na casa.
Para facer os buratos interiores, de non termos molde, podemos empregar o bico dunha botella estreita.
Deixar repousar 45 minutos
Pasos para fritir os dónuts:
Poñer aceite en abundancia nun cazo a lume medio/alto.
Deixar cada dónut, aproximadamente, de 1 a 2 minutos por cada lado (dependendo sempre da potencia da cociña).
Pasos para facer o glaseado:
Fundir o chocolate coa manteiga a baño maría.
En canto o chocolate estea listo, incorporaremos o azucre e mesturaremos ben até que estea totalmente incorporado.
NOTA: Cómpre que non deixemos arrefriar os dónuts antes de glasear. Unha vez os quitemos do lume, o ótimo sería deixalos escoar un pouco nunha grella e, seguidamente, pasalos pola glasa. Unha vez glaseados, volvémolos deixar na grella para que a glasa endureza.
Recendo 